ԼՂՀ ԱՆ. Կնքվեց քառակողմ փոխըմբռնման հուշագիր

ԼՂՀ առողջապահության նախարար Կարինե Աթայանը նոյեմբերի 24-ին ընդունել է «Ջինիշյան» հիմնադրամի գործադիր տնօրեն Արմեն Հակոբյանին, առողջապահական ծրագրի ղեկավար Զարա Ջանիբեկյանին և Քերոլայն Քոքսի անվան վերականգնողական կենտրոնի գործադիր տնօրեն Վարդան Թադևոսյանին:

Ողջունելով հյուրերին նախարարը շնորհակալություն է հայտնել հիմնադրամի կողմից իրականացված երկար տարիների աշխատանքների համար:

Հանդիպման ընթացքում ԼՂՀ առողջապահության նախարարության, «Ջինիշյան» հիշատակի հիմնադրամի, «Հովարդ Կարագյոզյան» բժշկական բարեգործական հասարակական կազմակերպության և «Քերոլայն Քոքսի անվան վերականգնողական կենտրոն» պետական ոչ առևտրային կազմակերպության միջև կնքվեց քառակողմ փոխըմբռնման հուշագիր` ուղղված Արցախում աուտիզմով և մանկական ուղեղային կաթվածով ախտորոշված երեխաների համար վերականգնողական կենտրոնի ստեղծմանը:

Ծրագիրը կիրականացվի Ստեփանակերտի Բարոնուհի Քերոլայն Քոքսի անվան վերականգնողական կենտրոնի կողմից` այդ նպատակով վերականգնողական կենտրոնի տարածքում ԼՂՀ կառավարության ջանքերով կառուցվող շինությունում:

«ԼՂՀ-ում ցերեկային վերականգնողական կենտրոնի ստեղծում` աուտիզմով և մանկական ուղեղային կաթվածով ախտորոշված երեխաների համարե ծրագրի ընդհանուր նպատակն է բարելավել աուտիզմով և մանկական ուղեղային կաթվածով ախտորոշված երեխաների կյանքի որակը: Կենտրոնի կառուցման աշխատանքները ընթացքի մեջ են և կավարտվեն 2016թ. դեկտեմբերի վերջին, զուգահեռ իրականացվում են նաև մասնագետների վերապատրաստում:

Կարինե Աթայանը հավելել է, որ արդիական է նման կենտրոնի ստեղծումը, այն առողջապահության համակարգի լուծում պահանջող հիմնախնդիրներից է:

Նախարար Աթայանի հետ քննարկվել են կենտրոնի ստեղծման աշխատանքների հետ կապված կազմակերպչական հարցեր: Դիտարկվել են Ստեփանակերտի բուժհիմնարկների, շրջանային բուժմիավորումների և տեղամասային հիվանդանոցների, ԳԲԱ-երի միջև հաղորդակցման ապահովումը`վերջիններում ստեղծելով ախտորոշման որոշ հնարավորություններ (ԷԿԳ ավտոմատ եզրակացություն, գլյուկոմետրիա, արյան և մեզի որոշ անալիզներ):

Հանդիպման ավարտին նախարարը շնորհակալություն է հայտնել համագործակցության համար և հույս հայտնել, որ այն արդյունավետ ու շարունակական է լինելու:

Հարցեր, պատասխաններ, մեկնաբանություններ